SUN奇古怪：Sun潮語【腐女】

多得幾年前日本有套電影叫《電車男》，令好多人認識到「御宅族」，亦即係所謂嘅「宅男」。講到「宅男」大家都知係邊類型人士，即係足不出戶，一日花好多時間匿喺屋企流連互聯網，沉迷打機，欠缺社交，不修邊幅嘅人。但係「宅」其實又唔一定局限係男性，其實好多女性，尤其單身嗰班，有好多都好「宅」。有個潮語叫做「腐女」，有好多人以為「腐女」係女版「宅男」咁解，其實大錯特錯，「腐女」同「宅男」雖然都係嚟自日本嘅舶來語，其實係兩件事嚟！

不過又難免令人誤會嘅！「腐女」當中嘅「腐」字，單看字面總令人聯想到腐化、腐臭、腐朽、腐爛、腐屍等等，總覺得唔係好嘢。所以好多人見到「腐女」一詞，就覺得係指女性無朋友又無男朋友，終日鬱喺屋企吽，吽到腐爛咪變「腐女」囉！其實「腐女」嘅意思同腐爛腐朽絕對無關。

根據維基百科及其他相關資料，「腐女」係由日文「婦女子（ふじよし）」轉化而成。「腐女」其實係指一啲鍾意睇 Boy Love 漫畫、動畫、電視、電影或小說嘅女仔。Boy Love簡稱BL，即係男男之愛，但又唔係真正嘅同性戀，而係日本少女漫畫一種獨特體裁，講美少年與美少年之間嗰種近乎純潔嘅愛情。「腐女」們喜歡嘅就係呢種虛構世界裏面嘅男男之愛。但現實上「腐女」又未必真係一位同性戀者。

依家香港甚至有網台節目，係由「腐女」主持，內容係分享「腐女」族群嘅心聲。所以「腐女」同「宅男」係完全兩回事，唯一共同點係大家都好沉迷一個唔現實嘅世界。不過，咁又有咩問題？如果現實係一個悲慘世界，可能沉溺喺虛擬，都係一種解脫呢！