政壇：CY新春酒會酬謝「梁粉」

特首梁振英（CY）喺施政報告公布前，相約一眾「梁粉」到禮賓府聚會，明眼人都睇得出係「梁粉」答謝會，但一眾嘉賓離開時竟異口同聲話呢個係新春酒會，仲有成個幾月先到農曆新年，呢個說法真係講都冇人信。

逾百名出席聚會者清一色都係「梁粉」，包括行政會議成員張志剛、全國政協委員劉夢熊、明天更好基金行政總裁鄧淑德、北區區議員劉國勳等，連最近疑捲入元旦「挺梁」遊行派錢風波嘅新界總商會，其會長張德熙都未有受傳聞影響照樣出席。

據引述，CY只係重申施政報告唔會「派糖」，而出席酒會嘅兒科醫生李家仁被問到CY僭建問題時，李醫生忽然唱出「小明做特首」力挺CY，確係忠實嘅「梁粉」。