政壇:余志穩狠批貪曾不公義

融樂會執委同樂施會總裁余志穩(阿魚)曾做過前特首曾蔭權爵士治下嘅社會福利署署長,退休三年,佢加入咗新政府嘅扶貧委員會,尋日出席電台節目時狠批前朝貪曾政府死守「大市場、小政府」原則及以「漏斗理論」治港,完全無助解決貧富嚴重兩極化問題,仲搞到社會出現不公平、不公義亂象。

提起貪曾禍港七年,阿魚直言本港貧富懸殊情況仲嚴重過部分非洲國家,仲批評不公義現象令香港「只要勤力都可以做李嘉誠」嘅理念只能回味。貪曾治下秉承「假大空」作風,治港口號唔少,其中「漏斗理論」美其名係先照顧大財團利益,經濟繁榮嘅成果最終會滲漏到基層市民手中,但眾所周知貪曾貪盡海陸空,唔單止充分照顧大財團利益,更多次接受富商款待,有咩油水都畀佢舔乾舔淨,幾時漏到基層市民手中?

阿魚又喺節目上不點名批評,有政府官員對本港營商環境多年來高踞全球前列「沾沾自喜」,呢個咪就係貪曾任財政司司長時成日掛喺口邊嘅「輝煌成就」?

第一手消息請下載on.cc東方互動iPhone/iPad/Android/Windows Phone Apps