政壇：遊行報大數害自己

香港係示威之都，大大小小嘅示威、遊行無日無之，仲因此衍生香港式嘅遊行報大數文化！今年元旦遊行挺梁反梁陣營各自報人數，民陣話當日有十三萬人遊行，警方就話只得二萬六千人；挺梁陣營話有六萬人，結果警方統計得八千。佢哋鬥車大炮，搞到曾經多次為大型遊行點算人數嘅港大社會工作及社會行政學系教授葉兆輝睇唔過眼，尋日直言咁樣「你做初一、我做十五」報大數只會抵銷民眾聲音嘅力量，最終只會令到市民用腳投票嘅公信力愈來愈差！

葉兆輝尋日係港台節目《香港家書》細述佢對遊行研究嘅心得，雖然佢今年冇做元旦遊行嘅人數調查，但根據過往幾年嘅經驗，佢認為只要將警方嘅高峰期遊行人數乘以一點二至一點四，就可得出較客觀及可信嘅數據。按警方估計元旦民陣遊行高峰期有二萬六千人，用佢嘅方法推算實際人數應該係三萬一千至三萬六千人，同港大民意研究計劃估計嘅三萬至三萬三千人相若。換言之，民陣當日或將人數「發水」咗約十萬人。

「數字不會講大話」

葉兆輝話，元旦遊行主辦者同警方嘅數字相差達五至六倍，雖有說法認為將兩者數字相加除二就係實數，但佢就話並不正確，原因又係報大數：「若果遊行人數不斷發水，無論挺政府還是反政府，最終只會抵銷了民眾聲音的力量。」葉兆輝仲大講統計學嘅宗旨「數字不會講大話，但講大話嘅人會扭曲數字」，認為硬將一千人講為一萬人，數字亦會變得冇意思。