監管食油太兒戲 補鑊修例也求其

唔賭唔知運氣，太一叮愈來愈覺得，靠港府監管食物安全就好似賭一鋪，夠運就無事，一個唔好彩隨時中招。呢，好似最近令人聞而色變嘅致癌食油咁吖，再次暴露當局監管不力，把關機制形同虛設，咁搞法，市民唔被害死都被嚇死啦，叮！

嗱，毒食油搞到全城恐慌，官老爺唔敢再滋油，食物及衞生局局長高永文話喎，諮詢過專家意見之後，決定將致癌物苯並〔a〕芘納入恒常檢測項目，每公斤含量超過十微克，就會要求供應商回收，每公斤超過二十微克，更加會強制回收咁話。另外，立法會食物安全及環境衞生委員會尋日亦通過動議，要求港府盡快立例規管苯並〔a〕芘。

呢啲咪叫後知後覺囉。苯並〔a〕芘係致癌毒物，歐盟早就立法規管，連食物安全水平落後嘅內地都設有檢測規定，反而香港不監不管，任由問題食油長驅直入，危害市民健康，真係講都無人信！

仲有呀，本港油業不斷變遷，早就由製油轉變成入口分銷，但係當局因循守舊，一成不變，依家仲容許入樽工序唔需要領牌，唔怪得毒油流入本港都懵然不知，知道之後又追查唔到源頭。你話喇，咁嘅把關機制係咪形同虛設吖？正如立法會議員話齋，當局真係渾渾噩噩，後知後覺。

話時話吖，當局補鑊都唔係好徹底嘅咋，將食油苯並〔a〕芘含量上限定喺每公斤十微克，只係同內地睇齊，遠遠落後於歐盟每公斤最多含兩微克嘅安全水平，咁同攞市民嘅健康當賭注無乜分別嘅咋。

食物安全關乎人命，把關寧緊勿鬆，就好似學生咁，梗係向品學兼優模範生睇齊啦，點會向一個科科捧蛋嘅包尾大幡學習o架？咪話太一叮踢爆吖，香港食油主要由內地供應，官老爺唔敢將標準定得太高，皆因佢哋知道內地食品安全靠唔住。

唔係危言聳聽o架，日前之嘛，國家質檢總局通報食用油同肉製品等二十八類產品嘅質量監督抽查結果，居然多達二百六十幾種食物唔合格，部分除咗驗出超標苯並〔a〕芘，亦驗出另一強致癌物質黃曲霉毒素，食完隨時導致肝癌甚至死亡，問你驚未！

所以話，為食物安全把關真係唔可以馬虎o架，尤其內地黑心食品氾濫成災，香港隨時受到池魚之殃，市民一次都唔想博呀，港產官僚唔該醒醒定定，睇緊啲吖，叮！