SUN搞作：打橫嚟講：民建聯派錢搞公投

本欄上星期，早在此講及亞洲各國都有「年度漢字」選舉，哈哈！居然提供了一個點子畀政黨民建聯「抄橋」，佢哋揀咗十個中文字畀市民公投，話呢個活動用以對過去一年的回顧和總結，及反映社會對一三年嘅期盼喎！

民建聯還請咗「返嚟就郁」嘅曾鈺成，同講唔出中國五星旗代表乜的蔣麗芸，和讀音字典派的何文滙做選委，精心挑出的候選漢字為：和、育、誠、安、正、才、建、實、禮和成。

嘻嘻！這十個字怎樣有「回顧」和「總結」意思，恕筆者不才，看不出苗頭，但有傳媒指民建聯用「誠」和「實」字，是有意向梁振英「贈興」，想大家記住「誠信」和「要忠實不欺」也！而民建聯的簡介，則話「誠」，是「真實無妄」、「言行合一」；「實」呢，就是「政府必須踏實做事」。今日香港人活於「誠惶誠恐」中，源於政府用人「笨實」囉！

至於個「正」字和「才」字，民建聯的「解釋」：「香港要走上正路，反對假、劣，人才是香港的重要資產。」咁話。係呀！假大空及劣質的庸才，千祈唔好留住喺黨內呀！一有機會就用炮仗送佢走吧！喂！另外，想順便問一問歪音王何大師，「四正」的粵音，點讀呀？

常被嘲諷「禮義廉」的民建聯，好有風度及幽默感，竟接受選委意見，攞個「禮」字出嚟玩，真有把炮，但我卻讚許佢哋做得最正確的，就是十個字之中，都無個「恥」字，好合身份，有台型。

民建聯想多人參與「公投」，用舊橋，大力派錢作吸引，就算贏唔到頭獎，安慰獎都有八舊水超市禮券，多過遊行的二百五，並且，係光明正大的，唔使喺臭哼哼的廁格內派錢，大家快啲投票呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府