政壇：政商定格：建仔「陳妍希」雪山影婚照

建仔嘅中西區區議員Kathy蕭嘉怡前日喺社交網站正式宣布婚訊，附上同未婚夫喺雲南麗江玉龍雪山影嘅婚紗照，而佢嘅黨友中西區區會副主席陳學鋒留言打趣話，自己一定會流失大量年輕男性選民喇！

據聞Kathy同未婚夫都係珠海新聞系同學，由於另一半鮮有曝光，所以婚照上載後即惹起哄動，不足一日已超過四百五十人like，留言表示恭喜嘅更加不計其數，有人仲大讚佢好似台灣紅星「宅男女神」陳妍希添！

對於畀人話似「宅男女神」，佢自言唔似對方亦冇咁靚，但都連番多謝大家稱讚喎。講番張雪景婚紗照，佢話特登揀咗去年五月，玉龍雪山啲雪就嚟融嘅時候去影，前後影咗一個鐘，為咗保暖佢黏咗十個暖包。佢仲話計劃喺農曆新年前正式擺酒結婚，希望趕及派利是喎。