政壇：胡家驃遊古巴愛上雪茄

六十幾年前曾與恒基地產主席「四叔」李兆基、新鴻基地產創辦人郭得勝同馮景禧等人成立永業公司，合夥經營地產嘅大慈善家胡兆熾，家族後人開枝散葉。

胡兆熾嘅仔胡寶星同孫兒Jackson胡家驃都係城中知名律師，Jackson更自立門戶添！身為名門之後，Jackson除埋首律師工作外，閒時鍾意旅遊同養馬減壓。由於爺爺當年以經營「喜蓮牌」電髮產品起家，所以胡家名下馬匹都以喜蓮兩字命名。佢話家人感情融洽，經常十幾二十人浩浩蕩蕩出遊，印象最深刻係兩年前去古巴玩，當時古巴仍未完全開放，彷彿時光倒流幾十年前，佢仲因此愛上雪茄，屋企收藏好多靚雪茄。

Jackson又醉心收藏當代藝術品，呢個嗜好喺英國就讀時已開始，多年來累積珍藏已過百件，難怪胡太楊曉鳳經常投訴冇地方擺放喇！講開又講，早前佢同爸爸仲聯同四叔捐款資助清華大學興建全亞洲最大嘅法律專業圖書館添！