產業多元拖太久 財爺別再搵藉口

聽日正式踏入二○一三年，太一叮喺度祝大家新年萬事勝意！咦，財政司司長曾俊華都湊熱鬧喎，寫網誌話祝大家新年快樂喎，不過市民睇完之後，可能唔止無增添快樂，反而更加笑唔出。

鬍鬚曾講咗啲乜嘢，令到大家笑唔出呢？係咁嘅，佢話本港回歸以來公共開支增加超過一倍，市民唔使大幅加稅完全歸功於經濟持續增長，所以咯喎，面對人口老化引致福利支出不斷增加嘅財政擔子，如果大家唔想加稅，就要着力發展經濟嘞。

唓，鬼唔知阿媽係女人咩！鬍鬚曾究竟想講乜啫？大家稍安毋躁，後面至係戲肉。鬍鬚曾繼續講，喺發展經濟方面，聽到有意見指香港經濟過分依靠金融及旅遊等四大傳統支柱，佢唔止唔同意，仲掉轉頭叫大家切莫盲目追求發展新產業，而輕視傳統產業喎。叮！明晒，鬍鬚曾廢話連篇，原來想為財政預算案補底！

嗱嗱嗱，咪話太一叮以君子之心度小人之腹呀，鬍鬚曾自稱黃飛鴻唔知第幾代弟子，最耍家就係玩施政無影腳o架嘞，搞扶貧無影無蹤，搞創意產業無影無蹤，搞創新科技無影無蹤……咁搞法，搞產業多元化會唔會又係無影無蹤o架？下一份預算案會唔會又係重施故技o架？

醜婦終須見家翁，如果明知預算案喺發展多元產業交唔出貨，鬍鬚曾率先借網誌埋下伏筆，為自己度身訂造一個下台階，正常o架，至於理據九唔搭八，又係另一回事。

喂，係人都知o架啦，本港產業結構單薄，次次遇上金融風暴都抵禦乏力，發展多元產業已成社會共識，點會係盲目追求呀？點會令傳統產業被輕視呀？計太一叮話齋，鬍鬚曾唔好盲目搵藉口就真，如果預算案又係炒冷飯，發展多元產業交白卷，你個官位唔比本港經濟結構穩陣幾多o架咋！

講起都唏噓，香港十幾年來一味食老本，炒股炒樓固然靠唔住，就算旅遊物流等其他支柱一樣搖搖欲墜。前朝政府口口聲聲發展六大產業，結果周身刀冇張利，醫療產業變「雙非產孽」，教育產業變教育慘業，市民未見其利先受其害。計起上嚟，呢筆帳市民都未同鬍鬚曾算清楚。

咁啦，將功補過，鬍鬚曾如果真係想大家新年快樂，唔好無無謂謂寫網誌嘞，畀心機寫好份預算案啦，將經濟搞到生機勃勃，市民唔使你提都會快樂，叮！