政壇：政商定格：入廠兩周發叔感冒未清

七十六歲嘅新界鄉議局主席劉皇發「打敗仗」，兩個多星期前患感冒，仲入埋醫院。一向身體健壯嘅佢今次一病兩個幾星期，期間兩次「告假」出院。

留院中嘅發叔據聞已無大礙，只係感冒一直未清，為穩陣起見，繼續住院休養。今次中招，聽聞係兩、三星期前出席大澳一個活動冷親。十七號發展事務委員會會議，即係討論特首梁振英僭建但最終流會嗰次，身為主席嘅發叔因病告假，兩日後人大選舉投票，佢向院方告假出院，戴口罩出席。

幾日後嘅平安夜，已好番好多嘅發叔再次請假出院，同屯門區內人士聚餐，大家有講有笑，勢估唔到席間有人感冒，口水花四濺，發叔因感冒未清，再次中招入院。