政壇：搞搞政：阿Paul反碗底批評中聯辦

由立法會功能組別轉戰直選成功、被戲稱「西環契仔」嘅議員Paul謝偉俊，早已有傳佢係靠中聯辦背後「發功」，極力配票先成功「空降」九龍東。

尋日佢接受一個電視台訪問時，親口承認當時中聯辦有幫佢拉過票，譬如話介紹佢識一啲重要嘅人、社團咁，但佢解釋呢啲幫助或賞識，係建基於佢一個完全獨立嘅身份喎，佢又澄清自己係「香港仔」唔係「西環契仔」，仲話如果要佢投晒降，所有嘅嘢好似投票機器咁（投票），佢唔能夠接受。

之後，佢又主動批評中聯辦，話佢哋唔適宜喺公眾面前出現太多，「好似黃大仙區某條邨嘅一啲活動，都搵個中聯辦官員坐喺度做主禮，而且主禮位置仲要喺香港官員之上嘅，呢種感覺整整吓好似香港似足晒內地嗰套，有個政府又有個書記咁，相信香港人會覺得唔係幾舒服。」

正所謂「得人因果千年記」，之但係阿Paul唔單止冇記住，得人恩惠後竟然又叫人唔好太多露面，唔通佢冇睇過吳楚帆主演嗰齣粵語片《香港屋簷下》，冇聽過「食碗面反碗底」呢句金句？

就阿Paul嘅言論，白鴿黨懷疑中聯辦觸犯選舉舞弊及非法行為條例，今日會去廉署投訴。