政壇：沈祖堯籲90後終身學習

創校五十周年嘅文理書院早前慶祝金禧校慶，中大校長沈祖堯以嘉賓身份撐場，仲勉勵學生要以已故蘋果行政總裁喬布斯為榜樣，放眼世界。

「90後」青年嘆就業難，沈校長都有同感，佢提醒學生要終身學習嚟提升能力，迎接挑戰。佢又引述名著《誰搬走我的乳酪》，寄語學生喺面對變化時，要懂得應變和學會適應，並嘗試突破客觀環境嘅局限。

醫專會副主席鄭淇德都係文理校友，佢自爆小三時成績差被人踢出校，幸好文理有教無類，收佢由小五讀到中六，後來仲去英國讀牙科，如今做咗牙醫，難怪佢提起母校就感觸到眼濕濕。