政壇：富貴黨歸邊挺梁

城市論壇嘅氣氛一向都以火爆見稱，上星期喺唇槍舌劍之間加插埋肢體衝突，所以尋日節目保安相應增加，仲喺場中間以鐵馬劃出一條楚河漢界，將支持同反對特首CY梁振英嘅觀眾分成左右兩邊，兩陣營相隔一條約一米闊嘅通道，大部分觀眾都好乖按工作人員指示自行對號入坐。

兩派對陣而坐，「挺梁」組織「沉默之聲」一班成員就好團結咁，喺對方陣營發言時搖旗吶喊指摘泛民立法會議員家有僭建，又鬧對方「妖孽」云云。而「倒梁」觀眾亦不忘反擊要求CY落台同埋普選特首。

呢個座位安排對於旗幟鮮明嘅政黨組織當然有着數，但需知道政治光譜係好闊嘅，要不偏不倚置中而立就難做。好似一直以監察政府為己任，但又唔係逢梁必反嘅富貴黨咁，當日喺立會對CY嘅不信任動議就話可以投下有姿態性嘅棄權票啫，但當中間路線變成通道，佢哋又可以點選擇呢？富貴黨區議員邵家輝就選擇咗同一班「挺梁」組織並肩而坐。邵家輝話，其實CY上台後就阻截雙非同房屋問題上都「落咗好多苦功」，所以富貴黨論功行賞後，決定只係畀張黃牌佢，唔趕佢出場住喎。

譚香文被拒入場

唔知係咪論題太有趣，入場嘅觀眾亦相當多，搞到愛港之聲召集人高達斌講到興起仲質疑對家民陣畀錢請人撐場，激到民陣副召集人陳倩瑩反駁話，民陣先冇咁多錢請五十萬人上街。

而喺論壇中段期間，場外忽然有把女聲喺度大叫：「佢哋唔畀我入！」原來係黃大仙區議員譚香文。佢話自己攞咗籌但冇得入場，喺場外叫咗一排都冇人理，氣難下於是打畀場內朋友求救，結果由朋友轉達主持批准佢入場。佢一入場就向主持投訴入場遭拒，話攞完籌仲要排隊入場係打壓言論自由喎！睇嚟城市論壇雖然加強保安，但規矩依然無變，就係靠大聲就得！