警隊洩密又一單 教而不善鑊鑊甘

唔知係咪剝人光豬剝得多，英明神武嘅警察居然自己剝埋一份，主動「露械」，內部機密任睇唔嬲，而且唔係一次，係一而再再而三，問你服未！

嗱，警隊又爆FOXY分享軟件洩密醜聞嘞。有市民喺網上搵到卅四份警隊內部文件，涉及新界南總區交通警員撰寫嘅口供報告，內容除咗有被抄牌市民嘅個人資料，包括身份證、手機號碼及地址，仲有警方喺機場一帶擺放雷射槍嘅九個位置，連雷射槍準確度資料都有埋，可謂巨細無遺，驚死駕駛人士唔知咁。

即係咁，洩漏市民私隱已經夠晒離譜，連打擊超速駕駛嘅布陣圖都一覽無遺，天機盡洩，簡直不可思議。試諗下，警隊連內部文件都保護唔到，又點樣維護治安？點樣保護市民安全吖？

有電腦保安專家分析指出，今次洩密醜聞可能涉及警務人員喺警署或者屋企電腦裝有FOXY軟件，中門大開畀人乘虛而入。查實，警方為防止不斷洩密，早喺三年前已下達「格殺令」，禁止警務人員使用FOXY軟件，而呢次洩漏嘅部分報告就係「格殺令」出台之後撰寫，可見上有政策，下有對策，警隊內部管理混亂，漏洞百出，所謂格殺令純屬笑話。

話時話吖，警方洩密當食生菜，市民已經見怪不怪咯。呢嗱，幾個月之前就有二百幾份警隊機密文件透過FOXY軟件公諸於世，創下歷來單次洩密數量之冠，過百名市民受影響。最令人震驚嘅係，外洩文件居然包括女毒販做「金手指」，篤出同黨要求減刑嘅資料，咁重要嘅內部機密都洩漏，你話係咪靠害吖！

警隊洩密五花八門，除咗FOXY軟件，最新洩密途徑仲有智能手機即時通訊程式WhatsApp，近月先後有兩名警官公然違規，透過WhatsApp將內部文件及同上司嗌大交嘅內容傳畀下屬及同事。正所謂，上樑不正下樑歪，連警官都唔守規矩，普通警員更加關人個關，唔怪得警隊無密可保喇。正如網民話齋，近年多次外洩機密文件，警方仲未「學精」，證明指引形同虛設，亦證明警隊教而不善，豈有此理！

講開又講，私隱專員公署平時無所事事，依家係咪應該做啲嘢呢？嗱，千祈唔好話警隊頻頻洩密唔關你哋事呀！

無論點都好，警隊身為執法機構，肩負除暴安良、維護治安嘅責任，有令必行、有禁必止係最起碼嘅要求，如果連咁都做唔到，叫市民點樣相信你哋吖，叮！