SUN搞作：少膽虫手記：女同事都走光了

少膽虫呢排已經夠黑仔，點知尋日返到堆填區，竟然鬼影都無隻，平時斟開熱咖啡嘅阿姐同埋喺茶水間收風嘅秘書都唔見晒，少膽虫不由自主咁大嗌：「嗚呀！所有女同事都走光了！」少膽虫即刻衝入房搵淫賤黎，同佢講：「弊喇！女同事都走光了！」

點知淫賤黎氣定神閒咁話：「女同事走光有咩好睇，男同事走光我就睇啫！嗱嗱嗱，少膽虫你拉番條褲鏈先講啦。」

少膽虫一摸下邊，面都紅晒，即刻對住牆角拉番好，之後好尷尬咁問：「老……老大，但係《爛果》真係無晒人，班友仲話要搵白武士嚟，工會仲話要罷工呀！」自從上次嗌老細，畀佢覺得寸緊佢「腦細」之後，少膽虫就叫佢做老大喇。

淫賤黎冷笑一聲，拍一拍手，身後走出了一個米芝蓮車軚人，手按住淫賤黎膊頭。少膽虫定睛一看，不是肥豪是誰？

「喺危急嘅時候，我就諗起肥豪呢挺人才。」淫賤黎輕撫肥豪隻手，輕輕咁話：「好彩有佢，我先重拾番生命嘅樂趣同意義。佢令我破碎嘅生命完整。」

肥豪卻話：「又係呢條少膽虫呀？黎黎，佢喺我過嚟《爛果》做嗰陣，成日針對我！」肥豪對淫賤黎說話，聲色俱厲，淫賤黎卻顯得十分的「溫柔嫻淑」，人人既感奇怪，又有些噁心。少膽虫忍不住便發作了起來，叫道：「老……老大，你……你到底在幹甚麼？」

淫賤黎陰沉着臉，問道：「針對我豪豪的，也有你在內嗎？」少膽虫道：「你為甚麼受肥豪這廝擺弄？他冒充了你，任意發號施令，胡作非為，你可知道麼？」淫賤黎道：「我自然知道。豪豪是為我好，對我體貼。他知道我無心處理《爛果》報務，代我操勞，那有甚麼不好？」講到呢度，少膽虫覺得好唔對路，勁似東方不敗幫住楊蓮亭咁，要奪我老腫之位。

少膽虫正躊躇間，忽然中門大開，一個白盔白甲的武士衝入嚟。小白武士手持原力光劍，直取淫賤黎。點知淫賤黎將肥豪一推，擋咗過去，好慶幸咁話：「好彩有豪豪呢件人肉避彈衣！」小白武士再舉起劍，大嗌：「我代表台灣《爛果》員工收你檔！哎呀！」小白武士講完就瞓低，只見蘇哥企喺後面伸出一個拳頭。

淫賤黎見到咁，非常開心咁話：「哈！養兵千日，用在一時！蘇哥你嘅fing春係得嘅！」而肥豪因為肉厚，用膠布貼住傷口，無事企番起身。淫賤黎左擁右抱，非常滿足，唔耐煩咁對少膽虫講：「無你事喇，跪安啦！」

唉！國之將亡，必有妖孽！希望《爛果》員工振作團結抗爭，「一切歸勞動者所有，哪能容得寄生蟲！」（但少膽虫就請多多包涵，謝謝）