Sun奇古怪：Sun潮語：【調理農務系】

2012年無末日，大家工照番嘢照做糧照出街照上。香港一切又如常，係唔係有啲失望？起碼都有場風打，又或者求其整個綠色月亮天文現象應吓節都好呀？點知乜都無。眨眼一年又結束，2012年好似發生咗好多嘢，又好似咩都無發生咁，可能真係變幻才是永恒。不過可能因為今年係選舉年，多咗人關心政治，亦多咗好多新生政治團體或政策關注組織，其中一個竟然叫「調理農務蘭花系」，令到「調理農務」呢句嘢重新炒熱，其實呢句潮語好多年前已經有，仲係小學雞用語。

「調理農務系」其實係粵語粗口嘅諧音。記得喺小學時代，已經有人用嚟代替粗口，連學校老師都無符，因為當中連一個粗口都無。農業係關乎人類存亡嘅大事，中國又係以農立國，一班小學生打算長大後考入大學讀「調理農務系」，學習農業貢獻國家，作為老師應該鼓勵至啱。其實同期仲有好多呢類粗口諧音字，包括「條脷無毛」、「錶你有無」、「燒你數簿」、「少理老母雞」等等，全部都係問候人母親嘅粗口諧音，你可能都有講過。

「調理農務系」Faculty of Agricultural Management，香港9間大學都肯定無呢個系。就算有都肯定會遇到收生困難，香港邊有農地畀你調理農務？耕田種米？咪聽乞米！香港班怪獸家長，生得一個半個細路，如果個仔話我的志願是農夫，你估會點？肯定帶個細路去照腦。

其實今時今日，香港最賺錢嗰個農夫都唔係靠調理農務，而係靠唱歌。所以「調理農務」喺香港地絕對無市場，仲開乜「系」？