政壇：政商定格：黎志安研創App教煮餸

任職跨國IT公司高級諮詢顧問嘅Ricky黎志安喺電視節目贏得廚神稱號，咪睇佢咁後生，原來鑽研美食逾三十年，八歲已入廚房學煮嘢，後來為咗有一技傍身以便移民後搵食，遂正式學廚取得證書。雖然最終冇揸鑊鏟搵食，但天生愛煮嘢食嘅佢做IT人後，就鍾意匿埋廚房鑽研創新菜式當減壓，結果精通中、日、歐同東南亞菜式。

早前佢特登帶埋自家製嘅法國焦糖燉蛋、檸檬方塊等甜品，去探相識十幾年嘅老友、越世代創新媒體集團董事總經理Rex馬維業夫婦，密斟將飲食文化同Life Style數碼化，開發創新嘅互動App教人煮餸。Ricky太太Cammy笑言好期待，事關佢成日要幫Ricky做食材買手，若有App在手，材料一目了然，夠晒方便。