政壇：政商定格：按證劉怡翔退休做龍友

按揭證券公司總裁James劉怡翔入主按證八年，做埋呢幾日就退休，雖然未有計劃，但係玩攝影多年嘅佢就想去內地、南美同東北三省雪鄉影相，尋日更加拎晒佢喺韓國、川藏、約旦同新疆攝影嘅相冊同大家分享。

喺國金返工咁多年，佢都話有啲唔捨得。為咗安老按揭同小型貸款，佢真係推銷不遺餘力，三句不離新產品，話按證目的無變，但依家已經唔止服務銀行，仲服務埋長者同中小企，近日連中銀香港同南商都加入埋小型貸款行列，可以話係畫咗圓滿嘅句號啦。

至於即將接任總裁嘅Raymond李令翔，尋日亦同James喺按證門口影張靚相，當係簡單交接儀式啦，Raymond曾經處理存保制同雷曼迷債等事件，James仲大讚Raymond係「老手」，肯定做得好！