政壇：搞搞政：劉江華上任曲線分裂泛民

原建仔副主席劉江華加入政府辭去沙田區議會田心選區議席，各方估計田心區前議員公民力量潘國山喺今次補選會大跌票，吸引到白鴿黨、社民連同人民力量等泛民黨派想派人出選，趁機「光復」被建制派雄據多年嘅田心區，今日仲舉行協調會議講數。

白鴿黨提出，該黨主席劉慧卿喺該區設有地區辦事處，其愛將丁士元亦幫開佢做地區工作，自然應由佢哋出選。但社民連批評白鴿黨已棄守田心多年，冇理由到依家有機會贏就出嚟搶，再者社民連計劃由黨主席「長毛」梁國雄嘅愛將姜靈彰出選，但長毛亦明白泛民相爭只會令建制派得利，最近就讓步，建議抽籤決定由邊個黨派人出選。

人力原定派「女神」袁彌明出戰，但佢打退堂鼓，依家仲未有人選。不過人力都講明只會同長毛抽籤，唔會同被佢哋指為「投共」嘅白鴿黨抽。如果人力唔讓路，社民連亦冇理由唔選，最後又會好似早前嘅沙田鞍泰選區補選咁，一個建制派對三個泛民，潘國山想輸都難！估唔到劉江華上任政制及內地事務局副局長唔夠一星期，就令泛民加劇分裂，幫政府立奇功。