政壇：鄉議局撲水 發叔唔見人

新界鄉議局九龍塘舊址至今仍未賣出，但沙田石門新大樓嘅營運同工程費就借落一筆街數未找，搞到最近頻頻收律師信被追債，所以主席劉皇發早前就計劃喺呢個聖誕假下鄉撲水。不過，過去兩日只見副主席張學明落元朗六鄉同屯門鄉籌錢，但未見發叔蹤影，有傳發叔自上星期因感冒入院而缺席立法會發展事務委員會後，雖然曾出院回家休養，但近日又傳佢再度入院，而且聲線沙啞，病情撲朔迷離。

身兼行政會議成員嘅張學明前日話政府或會特赦四至六層村屋僭建，尋日到元朗六鄉及屯門籌款時，再度呼籲村代表促村民登記僭建，保證僭建物喺申報後五年內唔會清拆，因為呢個係政府對村民嘅承諾。佢又澄清冇同政府打龍通，政府點處理係政府嘅責任。不過點處理好似連環船咁嘅僭建村屋係技術性問題，鄉議局會尋求法律意見，為村民申訴同求情喎！