政壇：李宗德拍短片向妻示愛

今個月係和富社會企業會長李宗德結婚四十周年紀念，尋日佢出席一間以佢個名命名嘅全人發展教育中心嘅命名典禮，致詞時特別多謝太太一直都咁支持佢。結婚四十周年又叫做「紅寶石婚」，但佢話「首飾年年都送」，所以今年就搞搞新意思。

點同太太慶祝？佢話紀念日之前同朋友搞咗派對，但費事人哋送禮，所以冇提到係結婚紀念，而正日嗰日同太太、仔女同孫三代同堂食飯，佢仲喺嗰日親自拍短片向太太示愛添。至於喺短片中如何表達愛意，佢就懶神秘唔肯講。

尋日個命名禮真係撞都冇咁啱，除咗主禮嘅政務司司長林鄭月娥嘅英文名叫Carrie外，同場嘅民政事務局前常任秘書長「官場肥師奶」尤曾家麗都係叫Carrie，但佢哋就好似冇乜交流喇！