政壇：狄志遠連中三元

仲有幾日就同二○一二年講拜拜，多個諮詢委員會同法定機構嘅委員任期亦將近結束，政府尋日一口氣公布多項任命除舊迎新，當中包括多名「梁營」同「唐營」人士，但佢哋都唔夠「何營」嘅白鴿黨前副主席阿Dick狄志遠連中三元咁威猛，一次過獲委任三項公職，包括廉政公署審查貪污舉報諮詢委員會、禁毒常務委員會同保護證人覆核委員會小組委員。

記得喺早前嘅德育及國民教育科風波中，阿Dick以家校會代表身份力撐政府，換來時任白鴿黨主席嘅何俊仁兩度發表聲明狠批，包括話佢「思想幼稚」，差啲搞到要開除佢黨籍添。雖然國教科最後仍喺壓力下被迫撤回，但阿Dick瞓晒身撐政府，真係無功都有勞喇！今次任命只算係小小補償，嚟緊隨時會好似另一白鴿黨前副主席張炳良同前秘書長羅致光咁，獲特首CY梁振英政府加以重用。

「梁粉」「唐人」都有份

不過今次任命受惠最多嘅，始終係喺特首選舉期間支持過CY嘅多名「梁粉」，例如即將卸任港區全國人大代表嘅科大副校長（行政）黃玉山，就接替做咗問責局長嘅張炳良出任消費者委員會主席、天文台前台長「黑英」林超英做咗環境及自然保育基金委員會同環境保護運動委員會主席、高票連任港區全國人大嘅雷添良做咗教育統籌委員會委員、行政會議成員張志剛做咗廉署事宜投訴委員會委員等。

「唐營」方面，廠商會會長施榮懷做咗禁毒常務委員會委員、工總立法會議員梁君彥做咗廉署貪污問題諮詢委員會委員等。其中獨立監察警方處理投訴委員會就最誇張，兩名原副主席廠商會議員林大輝同地產及建造界議員石禮謙再獲續任，第三位新委任嘅副主席，亦係喺特首選舉中提名唐唐嘅保險界議員陳健波，即係監警會三名副主席清一色係「唐人」，證明CY一定唔會濫用警權打壓異見人士。