優才計劃難作為 經濟轉型大隻講

懷才不遇唔止可以形容一個人，亦可以形容一項政策，事關衙門充斥庸碌之輩，一項政策就算有天時地利人和，一樣難有作為嘅咋。呢嗱，輸入優才計劃就係例子嘞。

人不可貌相，政策成敗亦唔可以睇表面，優才計劃自○六年推出至今，總共接獲八千幾份申請，今年首十一個月更加破紀錄有一千八百多人叩門添。表面睇唔錯o架，但係再睇真啲，就會發覺貨不對辦，水分多多，效果成疑。

點解咁講？優才計劃係就係接到八千幾份申請，弊在最終獲批嘅只得二千四百人咁大把，同當初預計每年引進一千名優才嘅目標相差十萬八千里；再加上有兩成優才來港之後退出計劃，七除八扣之下，優才大軍變咗聊備一格嘅童子軍，只係得啖笑。

本來呢，人才貴精不貴多，如果優才計劃真係求才若渴海納百川，人數少唔算好大問題，最多丟架啲啫，最弊係優才計劃荒腔走板，人才來源狹窄，近八成來自內地，歐美專業之士興趣缺缺，反應冷清成咁，唔使優才都睇得出計劃出咗問題啦。唔怪得有人話，優才計劃發揮唔到吸入優才輸送帶作用，反而淪為內地明星攞旅行護照嘅特快通道，真係一語中的。

得人才者得天下，二十一世紀最寶貴就係人才，優才計劃本來係補充人才嘅最快捷途徑，點知前朝政府眼高手低庸碌無為，搞到優才計劃唔湯唔水，引入人才寥寥可數。退一步講吖，就算優才來港都未必能夠發揮所長，香港經濟結構單調，唔係炒股，就係炒樓，優才來港隨時氹仔浸蛟龍，有才難展，優才變庸才。

話時話，優才計劃就好似一塊鏡，將香港嘅經濟困局照晒出來。點解計劃吸引唔到海外專才呀？咪因為本港經濟結構單調囉，其他專業好似科技人才點會有興趣來香港發展呢？香港吸納唔到其他優才，又點樣發展其他產業呢？呢個惡性循環唔打破，香港遲早邊緣化嘅咋！

不如咁啦，現屆政府為咗擺脫人才缺乏嘅困局，不妨喺優才計劃之下加設一項，聘請優質管治人才，取代呢班庸官，咁香港就可能有得救喇，係咪！