政壇：政商定格：馬雲遲到夏寶龍奇招解困

阿里巴巴董事局主席馬雲前日參加2012中國民營企業峰會，佢由近郊餘杭開車到杭州市區嘅人民大會堂出席峰會，但因為沿途塞車，結果花咗一個鐘零四個字先去到。原本九點準時開幕嘅會議，直至九點十分央視主持董倩先行出嚟解釋，話因為省長、書記要等埋馬雲先開始，令到現場一眾企業代表「O嘴」﹗

到馬雲上台個陣，董倩仲問多佢一次點解遲到，搞到馬雲鬼咁尷尬，唔知台下嘅省委書記夏寶龍係咪驚得罪佢，之後上台向馬雲道歉。佢話塞車唔係馬雲問題，而係佢嘅問題，仲話五年後馬雲由餘杭去人民大會堂，只需要二十分鐘。聽到佢咁講，大家都高呼「好！」企喺一邊嘅馬雲亦因為有下台階而笑逐顏開。夏寶龍呢招真係高，既唔會落馬雲面，又唔會得失其他與會者，輕易拆解呢場小插曲，轉數果然夠快！