政壇：政商定格：黃家和珍藏靚酒等升值

愛歎靚紅酒嘅餐飲聯業協會會長Simon黃家和經常到法國參觀各區酒莊，月初佢仲自駕遊法國八日，由南部波爾多一路揸到北部布根地，累積行咗二千公里，都咪話唔攰。不過佢就話好享受箇中樂趣，欣賞沿途一望無際嘅景致。

Simon今次去法國係半公半私，傾生意之外，主要係出席位於普羅旺斯嘅聖馬田酒莊女莊主Mrs De Barry嘅聖誕派對。佢話呢個有三百多年歷史嘅酒莊係當地第一家被評定為Cru Classe級別，法國前總統招待貴賓都係用呢個酒莊嘅酒喎。當晚東主請咗隊中世紀樂隊即場演奏，佢仲同主人家齊齊載歌載舞添！

去到布根地，佢經過生產名酒Chambertin嘅產區，據講當年拿破侖每次打仗，都要帶呢隻酒喺身，而佢喺滑鐵盧一役中敗陣，就係因為唔記得帶呢隻酒。佢話家中收藏咗十支，目前每支價值逾一萬六千元，估計明年仲會升值。