政壇：搞搞政：林鄭招兵要求瓣瓣精

政府早前成立政策及項目統籌處，負責統籌扶貧同人口政策，等資源唔使重疊。部門由「好打得」嘅政務司司長林鄭月娥統領，最近政府開始對外請人，政策及項目統籌主任一職人工唔錯，起薪點由七萬一千蚊起，頂薪九萬三千幾蚊。不過入職條件相當「辣」，差唔多要求全能瓣瓣通，由項目設計、經濟分析、規劃管理到建築工程測量都要識。其中一項專業更要至少三年全職經驗。

能夠識晒咁多項唔同技能，私人機構好少有，政務官應該可以對號入座，但呢個位除咗要七年全職經驗外，仲要最少四年政府以外嘅任職經驗，換言之現任政務官就唔使諗喇。最後一項條件要求職者有出色溝通、組織同管理能力、專業領域以外有廣博知識，仲要「執行其他獲委派嘅職務」。即係點？即係要乜都識、乜都要做囉！如果能夠過到入職條件嘅，相信同林鄭一樣都係「好打得」之人。