政壇：長毛房署示威唔識署長

吸煙危害健康，社民連主席「長毛」梁國雄似乎亦深明呢個道理，近排去咗驗身照肺，尋日去醫院攞完報告就即刻走去房署示威。長毛叫口號時仍然中氣十足，佢話只係去做吓身體檢查，醫生話佢冇事，叫大家唔好亂估。至於醫生有冇叫佢食少啲煙？佢就咁答：「唔叫你食少啲煙嗰個就唔係醫生啦！」咁即係意見接受，生活態度照舊。

社民連尋日一行八人去房署總部抗議署方政治審查海報，唔畀佢哋喺屋邨宣傳元旦遊行。唔知長毛係咪照完肺太興奮，於是就諗住去房署搵運輸及房屋局局長張炳良出嚟照肺，問吓呢個「哎呀民主派」局長點解冇管好房署，任憑房署隻手遮天審查海報，阻撓佢哋呼籲市民上街示威，箝制言論自由。長毛講到興起仲話張炳良係「濕水炮仗」，點唔着，得個樣。不過長毛喺房署總部外等咗五、六分鐘，都唔見張炳良身影。

梗係啦！張炳良喺添馬艦返工。既然局長不在，長毛就即刻轉戰召喚署長，但房署署長係邊位佢都唔多記得，之唔係栢志高囉。