政壇：陳淑莊連環遊埠好疏乎

甩拖之後又落選立法會議員嘅Tanya陳淑莊，經歷「雙失」嘅佢一度失晒魂，但冇耐就重拾心情，短短幾個月內去咗幾次旅行散心。前排佢又同咗兩位女性朋友去不丹參加洗滌心靈之旅，轉個頭又轉往曼谷瘋狂掃貨，嚟緊又計劃喺天氣暖番啲時，陪媽媽去日本北海道玩，反觀佢班舊戰友就被困喺立會應付拉布戰，真係得失難料。

Tanya話不丹國民對外國人零舍親切，當地嘅文物保育亦做得好好，不愧為幸福指數最高嘅國家。不過最令佢懷念嘅，並唔係不丹嘅風土人情，而係三個女仔喺酒店嘻嘻哈哈嘅相處時光喎！

唔去旅行留喺香港嘅時候，佢會匿喺屋企做宅女，一口氣煲晒英國電視劇《Downton Abbey》嘅第一、二、三季，偶爾先以大律師身份接番幾單官司搵外快，認真疏乎。問佢會唔會趁依家得閒積極搵番個男友，佢就話有新戀情一定會通知大家喎！