SUN驚奇：兇鱷速遞一條龍

鱷魚速遞話咁易！繼鱷魚貝貝大鬧元朗山貝河後，大埔塘上村垃圾站外又現鱷蹤，一條被列「極危」物種的暹羅鱷懷疑遭人棄養。其實內地盛行飼養鱷魚之風早已吹至本港，本報記者直擊廣州寵物市場，揭發不少店舖公然違規將兇殘鱷魚作寵物出售，只需三百多元人民幣（下同）便可購得一條「BB鱷」。有店舖更提供專為港人而設的一條龍服務，額外支付五百元，便可安排「速遞員」將「BB鱷」偷運來港，聲稱保證成功。

飼養寵物鱷近年在內地大熱，不少人將剛出生的小鱷魚視為寵物，記者登入內地寵物討論區，單是有關飼養鱷魚的貼文已過萬條，不少網民交流飼養心得甚至兜售鱷魚。其中一個賣家與記者大談養鱷心得，「其實揚子鱷最易養，不過好難搵；依家我賣嘅係泰國鱷，呢種係入口鱷，買賣都無人管。」至於價錢，他指出，一條泰國鱷連同運費，只需五百元。「但你係香港人，我好難寄畀你，不如去廣州，佢哋一定幫到你！」

「每月閒閒哋賣十條」

位於廣州花地灣的越和花鳥魚藝批發市場是當地最大寵物市場之一，亦是寵物鱷集中地。在水族區內，除出售一般水族魚外，不少檔口在地上擺滿膠盤放置不同品種的龜類，部分夾雜蝎子、蛇及蛙外，還有鱷魚。

記者在其中一店的玻璃缸內見有三條小鱷魚，每條約一呎長，索價三百三十元，只見小鱷魚十分生猛，在缸內張牙舞爪，可愛欠奉，卻盡顯其兇猛本性。

女店主見記者駐足，即上前兜搭：「呢款係泰國鱷魚，佢一啲都唔惡，我好多客都買嚟當寵物養，每個月閒閒哋賣到十條八條。」說罷，女店主隨即伸手入缸，徒手將小鱷魚拿出來，她說：「你睇！喺後面捉住佢嗰頭，隻手唔好擺喺佢面前，咪唔會咬你囉！」只見鱷魚不斷張開利牙、擺動身軀掙扎，在旁觀看的記者亦不禁為女店主抹一額汗。

「好多香港人係熟客」

鱷魚成年後體形難免愈來愈大，不過女店主卻大派定心丸說：「你唔使擔心，你畀個細缸養佢，一個星期餵佢一次，佢就唔會大；我呢三條鱷魚都養咗半年，都無乜點大。」得悉記者來自香港後，女店主突然壓低聲線，神神秘秘說會提供另類速遞服務。「你畀多五百蚊，就幫你搵相熟速遞公司，只要綁住鱷魚個口，放落發泡膠箱，佢哋直接喺羅湖送嚟香港。」

女店主自言費用較一般速遞貴，「包埋塞畀速遞員嗰啲錢，雖然話綁住鱷魚個口，不過鱷魚喉嚨都會發出嗚嗚聲，都要速遞員詐聽唔到至得o架！」雖然偷運鱷魚在中港兩地均屬犯法，不過女店主自言無有怕：「佢哋（速遞員）知道點做o架啦，捉到點算？梗唔會啦，又唔係第一次，已經運過好多次，好多香港人都係我熟客，包無失手。」

「有啲人貪得意，係內地走私鱷魚返嚟，養養吓先知大件事。」香港兩棲及爬蟲協會會長楊嘉文稱，過往亦聽聞有另類寵物愛好者玩無可玩，冒險從內地偷運鱷魚來港。「鱷魚唔係咁易養，好多人會養死佢，不過養死算係好彩，如果唔係鱷魚愈嚟愈大都唔知點算。我聽過有人見條鱷魚太大，索性劏咗嚟食。」

漁農自然護理署發言人表示，鱷魚受香港法例《保護瀕危動植物物種條例》規管。進口本港的動物須附有進口許可證和衞生證明，但基於公眾安全理由，入口鱷魚不會獲發許可證。違反規定，最高可處罰款港幣五百萬元及監禁兩年，過去三年未發現有走私鱷魚。