政壇：政商定格：梁青華賀節短片like爆

智能手機流行，唔少人都利用手機傳送賀節訊息或短片，前鐘錶業總會主席兼喜運佳常董梁青華就有新搞作，佢唔甘於轉發人哋寄嚟嘅短片，一於花幾千元度身訂造「華哥Style」賀節短片，結果喺城中老友之間瘋傳，個個都like爆。

日前喺馬場見到香港傳藝中心校長吳子文（William）夫婦及太子珠寶執董朱繼陶，佢哋都推介華哥條賀節短片，短片由華哥與愛駒「張家界」領銜主演，長約六十秒，片中「張家界」取代麋鹿，拉住扮聖誕老人嘅華哥及禮物，唔小心跌入馬房煙囪，於是變身牛仔嘅華哥同眾騎師齊跳熱到爆嘅騎馬舞，難怪一向支持原創設計嘅William勁讚不已，仲叫華哥去登記版權添！