政壇：搞搞政：司徒法正提議明年玩股

仲有幾日便到二○一三年，好多投資人士已經做完年結，放完假期後，又開始新一年嘅搏殺，唔少人都期望新一年有指路明燈，日前研究風水命理嘅司徒法正出席一個活動就被視為呢盞明燈，唔少場內人士都希望佢指點吓新一年嘅投資大法。

司徒法正話，明年年初樓市將進入低潮，想投資房地產嘅市民要忍手。樓市睇淡，股市又點呢﹖佢話，金融市場前景反而唔錯，建議市民可以喺股市「發揮吓」，但係隨意玩吓好喇，千祈咪太瞓身。咁講都冇錯o架，古語有云過猶不及，任何事做得太過都有風險，何況係變幻莫測嘅股市，呢個原則無論牛市熊市都啱聽。

講完投資，司徒法正都醒你平安貼士，佢話港人鍾意出埠旅遊，而東北位置（即係日本）仍然有地震風險，建議市民出遊應該小心啲喎！