政壇：撐梁振英團體崛起抗衡

新一年好快拉開序幕，近期城中矚目事件離唔開「撐梁」同「倒梁」活動。泛民喺元旦日發起「倒梁」遊行，又計劃明年初喺立法會討論彈劾佢嘅動議。另一邊廂，卻係近日冒起咗唔少神秘組織撐政府同撐CY，雙方都話要上街。

CY上任以來經常話要落區聽市民聲音，但每次都被反對派踩場攪亂檔，令到唔少想發聲嘅市民不滿。近日就冒起唔少「挺梁」團體，除咗經常喺電台節目《城市論壇》見到嘅「愛港之聲」外，仲有「愛護香港力量」（愛港力）。CY早前喺地區搞嘅施政報告及財政預算案諮詢會，愛港力都有到場聲援，愛港力同愛港之聲喺嚟緊周日同元旦仲會舉行撐CY遊行及「愛香港、撐CY」嘉年華，實行同泛民嘅「元旦倒梁遊行」對撼。

此外仲有「梁粉天地」同近日發起「齊心簽名撐CY」行動嘅「齊心行動」，呢個組織向來自稱只係普羅市民、冇組織、冇靠山，較主張溫和路線。呢啲撐CY及政府嘅組織忽然冒起都好引人關注，好似愛港力最近搞咗個網民晚餐聚會，成員着晒愛港力自家制服，看似財力充足，究竟成員自己夾錢聯歡吖？抑或係背後有條大水喉贊助呢？直至截稿前仍未搵到佢哋嘅成員回應。