政壇：陳恒鑌假期勤練兵

聖誕假期有人歡歡喜喜去遊埠，有人打波睇戲玩夠本，民建聯嘅立法會新丁議員陳恒鑌就留守香港開工，今日仲會開記者會，以黨嘅衞生事務發言人身份講吓公立醫院急症室服務，喺呢個活動之前，佢又去過急症室視察，又同黨友做過問卷調查，公眾假期咁搏為乜？或者同陳恒鑌出任建仔衞生事務發言人以來，一直搵唔到位出頭有關啩，所以趁聖誕將勤補拙囉！

葛珮帆遊埃及叉電

經過約三個月議會生涯後，議會新丁都逐漸進入咗新角色，陳恒鑌亦唔例外，但佢雖獲黨分配負責衞生事務，過去三個月卻一直唔見有乜代表作，甚至喺呢一瓣中形同透明，好似早前發生DR醫學美容嘅事故致死案件，當時新一屆議員雖然仲未履新，但有啲政黨已經分咗工，白鴿黨嘅黃碧雲、工聯會嘅麥美娟同為女性，講起美容零舍肉緊，喺件事上好快取得控制權。

之後輪到審計署批評私家醫院帳目同管理，立法會政府帳目委員會召開聆訊，偏偏建仔坐喺呢個會嘅人係已成議會老手嘅陳克勤，搞到陳恒鑌接連喺相關範疇無處上位。聖誕新年假期來臨，陳恒鑌終於主動出擊，介入急症室假期服務呢個老問題，之前佢已親身去公立醫院巡視、做定功課……將勤補拙總好過一路捱打噃。

建仔另一新丁蔣麗芸（Ann）相比起來就慳水慳力啲，佢哋喺平安夜發表咗一份市民對就業滿意與信心程度嘅調查，具名人就係身為建仔人力事務發言人嘅阿Ann。另一建仔新丁葛珮帆就話幾年未放過假，呢個假期一於好好叉電，同老公外遊，事前仲揀定要去個唔凍嘅地方，最後佢哋揀咗去埃及，睇吓影吓法老王同金字塔，順便坐船遊尼羅河，呢個假期，一於各自修行。