SUN搞作：打橫嚟講：Hong Kong Doomed

呢個香港特區政府真愛開玩笑，喺全球講緊世界末日的前夕，竟公布聘任「超級區議會」的敗兵劉江華做政內局副局長。地球未崩裂，也想嚇香港人一跳乎？

劉江華入局，正反映香港政治人才的仆直凋零，係邊叉個粉腸提議搵佢o架？做乜咁惡毒，害香港呀？香港人才死Q晒喇咩？無飯食，都唔使食垃圾o架？

劉華的牙齒痕，多到連民建聯內部黨友都頂佢唔順，大家皆想送佢走好耐，這已是公開的秘密，所以，今次政府肯收容佢，民仔主席譚耀宗立即站出來興高采烈地大叫「割愛」，開心死咯！起碼，唔使再用黨資源養廢柴。

仲有，香港政府出稿解釋，請劉華的原因，話佢有豐富議會同選舉經驗喎！但佢同成個立法會嘅議員關係差到痹，無人緣，係人都知，我哋睇唔到佢工作上有乜優勢喎！

加上，政制事務上，又不見得佢熟呢瓣吖！而局長譚志源食得佢住咩？畀佢有份參與政制事務工作，只是增加通過的困難，這不是香港之福囉！嗱！唔好畀我批中，有此佗衰家喺度，只會加劇香港市民的怨氣外，局方內部亦徒添內憂外患而已！肯定家嘈屋閉，香港無日安寧。唔信？可走着瞧！

香港局勢紛亂，已經到「臨界點」的了，有心為香港好，就咪再用一個不得人心和誠信零蛋的失敗者，世界仲未末日，this city先dying呀！大佬！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆

讀者可透過智能手機下載「東方互動」app，於「爆料」項上載影片大爆特爆！