SUN搞作：少膽虫手記：勤力唔會得

自從淫賤黎腦有事之後，《爛果》上下，個個都好鬼棹忌。就好似少膽虫今日同淫賤黎開會，一見佢入房，少膽虫即刻拎罐鞋油出嚟，死性不改咁，諗住擦到佢呢對踩住堆填區嘅鞋都可以照鏡啦！點知一嗌「老細……」，一巴掌就打落嚟少膽虫塊面，金星亂冒嘅少膽虫只係聽到淫賤黎大鬧：「腦腦腦，腦你條命！家陣個個想寸我腦殘呀？仲有呀，你啲鞋油同我死開啲，上次地溝油已經累死我！」

少膽虫唔靠樣搵食，打吓無所謂，只係心諗咁勤力擦你鞋都唔得，唔多忿氣，但都惟有灰溜溜咁返老腫個位坐啦。點知淫賤黎好似睇穿咗少膽虫個心，竟然話：「邊個話勤力係唔得o架？」少膽虫幾乎要跪低饒命之時，又聽見佢話：「今次勤力咁得，全靠呢位同事夠叻仔咋！」

少膽虫望向淫賤黎所指方向，當堂嚇窒，原來係蘇哥！此蘇哥不同聽日生日嗰位咁神聖，無幾耐之前都只係少膽虫手下一條小虫，但係點知佢上位仲快過穿梭機，少膽虫只好慨嘆辦公室政治一日都嫌長。淫賤黎又笑瞇瞇咁話：「阿蘇！你去做實習司機，表現得好好！你耍番你尋日套fing春出嚟畀大家開吓眼界！」蘇哥作一作揖，猶如一代宗師般fing起身。

睇佢一路條條揈，fing完東，又fing去西，直至蘇哥對住肥豪打出個日字衝拳，一直fing到頭暈嘅少膽虫，當堂明白晒！

原來佢衝住個「日」字，即係衝住啱啱煥然一新嘅《太陽報》而來！唔怪得知啦，前日有個報販畀「勤力」嘅司機勒索嘢飲，報販唔畀就借啲意掃亂個檔，推晒落地，仲有架「勤力」嘅貨van搞到撞佢架七人車反肚，竟然全部係蘇哥做！

少膽虫唔係驚訝佢周圍害人，少膽虫有咩人唔敢害吖？不過，少膽虫雖然係害人虫，但都係一條有良心嘅害虫，咁樣對付無辜嘅市民，唔怕天收咩？而且，少膽虫最驚訝嘅係，淫賤黎出蠱惑招打擊《太陽報》，竟然唔通知聲我！

淫賤黎又邊會睇少膽虫面色吖，繼續話：「阿蘇，你fing春fing得出神入化，以後跟出跟入保護我啦！」只見肥豪同少膽虫一樣，當堂因為失寵，默然垂下男兒淚。

唉！權力鬥爭，真係得人驚呀！邊個話勤力就一定得o架？