政壇：政商定格：兩個「譚校長」撐華仁籌款

華仁書院前晚舉行「華仁一家」籌款音樂會，活動大搞新意思，邀請咗巨星「譚校長」譚詠麟同港華「譚校長」譚兆炳同台合唱，八千個師生家長坐滿會場，氣氛高漲，為學校籌到過千萬善款。當晚唔少名人校友排住隊獻技，剛退休衞生防護中心總監嘅曾浩輝同音樂劇及電影作曲家高世章先後彈鋼琴露兩手，中文大學醫學院前院長鍾尚志吹色士風，仲有香港大學社會醫學系系主任Gabriel梁卓偉壓軸登場客席指揮，期間不忘暗寸前上司、食衞局前局長周一嶽。

Gabriel一踏上台板，就指揮華仁一家交響樂團，為阿倫伴奏一曲《忘不了你》。呢首歌之前畀有「政壇技安」之稱嘅周一鑊唱一唱，就喺網上紅透半邊天，隻歌嘅原唱者譚校長真係多得佢唔少，譚校長笑言，「我知道周局長都唱過我呢隻歌，不過佢就唱得比較『別樹一格』！」