政壇：政商定格：黃傑龍挺素食健康環保

提升快樂指數基金同中華廠商會尋日喺工展會合辦咗個親子烹飪比賽，評判之一嘅敍福樓集團執行董事黃傑龍話，食得健康係飲食界大趨勢，所以重手落油一定扣分！佢又話環保意識抬頭，素食成為一股新勢力，例如時下Green Monday所提倡嘅每周一次素食，無論對身體同環境都有莫大好處，絕對值得推廣。

另一評判、餐飲聯業協會會長黃家和就呼籲大家注重慢食文化，佢話飲食係一種享受，何必囫圇吞棗。慢食不但有助消化，又可以細味菜餚嘅味道，係對廚師嘅一種尊重。第三位評判係以生產電器起家嘅中華廠商會會董陳國民，佢話受到健康同環保風氣影響，經已捨棄以往喜愛嘅豬油同魚翅，得閒仲會煮番幾味，構思少油嘅健康煮食方式，從中仲得到電煮食鍋嘅設計靈感添！