政壇：搞搞政：教協謀變政黨配合直選

會前議員張文光宣布退休後，教協即時「協商」會長馮偉華接棒出選，舊年仲喺白鴿黨力勸下成為普通黨員。但人算不如天算，馮偉華臨門一腳因病唔選，由葉建源頂上，最後保住教協多年來一直雄霸嘅議席。正當外界以為葉建源會好似其他教協立會議員咁加入白鴿黨時，佢竟然耍手擰頭話絕無此事，選舉翌日仲高調表明，話自己唔係白鴿黨中人，暫時亦無意入黨。

教協副主席張文光承認，教協正探討有冇可能轉戰立會直選，又證實葉建源短期內唔會重投白鴿黨。張文話雖然教協同白鴿黨關係密切，但始終屬於唔同政治團體，吸納嘅支持者亦有差別。佢話如果政府喺未來兩屆立法會選舉全面取消功能組別，而教協又冇人參加直選，到時都唔知邊個可以繼續幫班老師發聲。

正因為咁，教協中人要考慮教協變身政治組織對會員嘅影響，暫時唔可以輕舉妄動。葉建源入咗立會唔夠四個月已成搶手貨，幾個泛民政黨都開出豐厚條件力邀加盟，但佢仍然毫不心動，原來係另有盤算。