政壇：肥仔張推介平價冰鮮牛

新鮮牛肉批發價格今年第七度加價，一斤牛肉直逼百元大關。當唔少市民猛話貴到買唔起之際，立法會飲食界「肥仔張」張宇人教路，話市民唔一定要揀新鮮牛肉，市面上仲有冰鮮牛肉、雪藏牛肉，而且價格平得多，只要配合適當食法都一樣咁滋味，佢更加係冰鮮牛肉嘅愛好者。

出晒名識飲識食嘅佢解釋，話食雞肉同食豬肉，當然愈新鮮愈好，但食牛肉又唔一定喎。佢話新鮮牛肉當然有新鮮嘅好，但冰鮮牛肉亦有獨特好處，因為牛肉要放置一段時間，肉身內含嘅酵素會隨時間產生aging（熟成）作用，唔止令肉味更濃、食落口仲嫩滑無渣。

佢話冰鮮牛肉最佳食法係用嚟打邊爐，所以次次打親邊爐都揀冰鮮牛，最近唔少市民都要求政府開放新鮮牛肉市場，以免被五豐行壟斷，佢就話一向支持有競爭，但聽聞政府諗法唔係咁，覺得開放市場都冇人肯做，價格難以回落喎！