政壇：鬍鬚曾減壓 聽歌想當年

為咗製作二月出爐嘅預算案，財爺鬍鬚曾最近忙到一頭煙，話籌備工作已去到「最劇烈」階段。點解寫預算案都可以好「劇烈」？咁就要留畀鬍鬚曾慢慢解釋。而佢喺網誌就自爆減壓良方，就係一邊煲歌一邊休息，仲要「煲」死一隻唱片。

鬍鬚曾喺網誌話，呢排每日都同唔同部門嘅官員開會，食完晚飯返到屋企都要繼續開工，唯一喘息嘅機會就係歸家途中喺車上聽歌，最鍾情六十年代崛起嘅拉丁搖滾樂團Santana嘅最新專輯，淨係近兩個月都聽咗二、三十次。佢話鍾意Santana係因為中學時移民美國，屋企附近好多拉丁裔鄰居，久而久之就愛上拉丁文化，本來諗住畢業後獨自闖蕩南美三年，但因家人極力反對而告吹。

照咁睇，似乎鬍鬚曾唔係聽歌減壓咁簡單，而係想緬懷年少輕狂嘅時候。古有關公捉棋刮骨療傷，今有財爺聽歌想當年寫預算案，兩人都識麻醉自己，唔知鬍鬚曾偶像係咪關二哥呢？