政壇：波波玩「樂」搞氣氛

聽日就係普世歡騰嘅聖誕節，唔知係咪因為迎難而上太繁重，今年啲司局長好似冇乜意欲同七百萬人賀聖誕。除咗政務司司長、財政司司長同政制及內地發展局有整聖誕電子賀卡外，其他決策局都好似冇乜佳節氣氛，而啱啱上京述職返港嘅特首梁振英，特首辦網站更加係零聖誕氣氛。

至於賀卡創意方面，財爺鬍鬚曾就繼續搵狗出面，叫佢隻日本柴犬Oliver出場講兩聲狗話，即係吠兩聲祝市民聖誕新年快樂。結果喺大家都頹搞之下，波波就成功以一招熱烈地彈琴突圍，令發展局靠齋播聖誕歌成為最有節日氣氛嘅決策局。

雖然發展局表面上一片歌舞昇平，但其實暗藏殺機，喺普世歡騰之後，預料發展局局長「波波」陳茂波將會有排「騰」，不過係「騰騰震」。事關聖誕過後首役就要應付本月三十一號截止嘅「新界村屋僭建物申報計劃」。

鄉紳打老人牌

前日先有鄉紳照搬反國教集會伎倆，拉埋一班老人家手舉「撤回」標語，要求局方撤回申報計劃。如果波波嘅聖誕願望係諗住播吓歌就可以蓋過班鄉紳，或者想用歌聲感化佢哋，要願望成真都幾有難度。

預計發展局喺二○一三年應該都會繼續成為熱廚房中嘅熔爐，單計新界東北發展計劃嘅戰場已經夠晒波波頭痕。但無辦法啦，邊個叫房屋政策係政府施政嘅重中之重喎。所以，或者發展局嘅策略係啱嘅，如果今日唔趁佳節熱烈彈琴齊慶賀，他朝都未必再有藉口展歡顏。