SUN搞作：網絡小說：噩夢成雙

少膽虫成日講報界秘史，都講到口臭，不如今日嘅手記就講吓少膽虫近嚟嘅心事。

其實，做得宣淫販賤嘅壹全霉，少膽虫成日都好驚會有報應。唔知淫黎係咪都有相同諗法，呢排少膽虫成日聽到佢細細聲自言自語：「唔係唔報，時辰未到，唔係唔報，時辰未到……」諗起都得人驚。

可能係日有所思夜有所夢啦，少膽虫呢排成日發噩夢，仲要一發發夠兩個。

第一個夢，係咁嘅：淫黎花盡力氣跑到九龍醫院，氣急敗壞的向護士查詢他的母親在哪間病房，得知後他一股腦的跑到四樓，只見整個四樓滿是比自己年輕的人。心急如焚的淫黎也沒空管這奇怪景象，便向醫生查明母親情況，醫生竟面帶笑容的說：「恭喜！恭喜！ 你做哥哥了！」淫黎雖然一頭霧水，但心內仍有一股欣喜，在場的年輕人大概都為他高興，紛紛拍掌，有些更歡呼起來。整個四樓充斥着歡樂氣氛。淫黎走進產房向母親道賀，打趣說：「媽，新爸爸是誰，怎麼我不知道？」但母親突然怒吼：「鬼知咩！唔係你個衰仔成日做埋晒啲折墮嘢！使成個四樓都係你個衰仔啲老竇！生死我咩！」

一個已經夠恐怖，點知陸續有嚟：少膽虫拎起車頭紙，睇到個標題嚇到叫咗出嚟，淫黎問咩事，我照讀畀佢聽，讀咗標題內文都未開始讀，佢成塊面白晒，自言自語，猛咁話「契爺殺到嚟，香港九龍新界無得避，要化身玉皇大帝打救蒼生；契爺殺到嚟，香港九龍新界無得避，要化身玉皇大帝打救蒼生……」跟住衝咗上天台，叫咗一聲「鳴呀，點解係我」就跳咗落去，成班同事追上去都追唔切，有兩個女同事嚇到暈咗，肥豪仲當場嚇到變咗弱智，不停問人要唔要食腸仔蛋。少膽虫就好好彩無咩事，但全體同事幾千人即時失業……

成日畀呢兩個噩夢煩擾，搞到少膽虫做嘢都無晒心機，諗住尋日星期五，拎番份《好報》醒吓神啦。點不知，揭開《好報》，先發現佢獨家爆料話淫黎可能有腦病，少膽虫當堂腳都震埋，心諗，唔係咁邪啩！