SUN奇古怪：Sun潮語【霸氣】

「力拔山兮氣蓋世，時不利兮騅不逝。」呢兩句咁有霸氣嘅古文，出自古人西楚霸王項羽嘅〈垓下歌〉。當時楚漢相爭，一直所向披靡嘅項羽，被漢軍元帥韓信用計打敗，最後被漢軍圍困於垓下。英雄末路，寧可烏江邊自刎而終，也絕不投降。項羽寧死不屈，戰至最後一兵一卒，响呢個時候，仲寫得出萬世傳頌、令世人嘆息嘅〈垓下歌〉，呢啲絕對稱得上係「霸氣」，霸王呢個朵，絕對唔係洗頭水牌子，而係貨真價實嘅一代霸王！項羽估唔到嘅係二千幾年後嘅今日，「霸氣」竟然成為年輕一代嘅潮語！

根據香港網絡大典嘅資料，「霸氣」最先出現喺討論區，並廣泛使用，係超勁犀利咁解。「霸氣」可以形容任何嘢，但又未必真係同打打殺殺有關。形容一啲有氣魄嘅人，都可以用到「霸氣」呢個潮語。「霸氣」亦可以用嚟形容一啲寫得好勁嘅留言，甚至用嚟形容一啲好有氣勢嘅衣着打扮，好型嘅車，好勁嘅裝備……總之逢親強勢又些微帶點浮誇都可以叫「霸氣」。可以咁講，「霸氣」其實係「犀利」嘅潮版代名詞。

但潮語「霸氣」甚至唔係嚟自中文世界，而係嚟自日本動畫「海賊王」！當主角修煉到一定程度，天賦才能會有所提升，散發更強「霸氣」。網民之後就用咗呢個「霸氣」嚟形容好厲害。呢篇文章見街之時，大家都應該安然度過咗瑪雅人所講嘅12月21日世界末日。但近期最厲害嘅係，特區立法會主席竟然喺大會上，以主席名義發言，唔批准有世界末日，要求2013年1月續會。連末日都可以由佢話事批唔批，呢啲叫咩？咪名副其實嘅「霸氣」囉！