政壇：政商定格：湯餘銘妙筆弘揚佛學

鍾情繪畫、更鍾情佛教藝術嘅大師湯餘銘，今個月二十七至三十一號喺本港舉行畫展，呢個名為《世界文化遺產石窟》嘅畫展，收集咗佢近年創作嘅百餘幅作品。湯餘銘從事繪畫超過四十年，書畫俱佳嘅佢因為鑽研佛教文化，幾乎走遍世界各地嘅佛教聖地，今次畫展就特別展出佢對各地石窟佛教藝術嘅心得。

講起湯餘銘，除一手妙筆備受矚目外，仲有一個憑電影《色戒》聞名中港台嘅女兒湯唯，今次爸爸喺香港搞展覽，女兒到時會唔會現身呢？佢話未知，仲聯絡緊。佢嘅畫展獲得香江文化交流基金會等多個機構協辦，呢一日，基金負責人江素惠都有出席記者會，湯餘銘即場寫書法，再贏得各人讚賞。