政壇：搞搞政：劉江華當官安全至上

獲港府委任為政制及內地事務局副局長嘅建仔副主席劉江華，尋日履新，由佢喺新政府總部落政府AM車，到喺政治助理陳岳鵬同局方新聞秘書傍住下見記者，一舉手一投足都官氣十足，發言更加好謹慎，同以往喺立法會嘅「重炮手」作風好大差別。不過，首日亦有政黨去佢前沙田區議員辦事處抗議，仲送安全套諷刺劉江華當選民係「用完即棄」，或者喺劉江華眼中，有另一個意思，就係當官最緊要安全！

劉江華尋日似乎帶病開工，眼紅紅、聲線又有啲沙啞，似係感冒未清。佢話，今次係第一次參與政府工作，以後會努力向前輩請教，向其他公務員同事學習，保持與各界溝通同聽取意見，絕唔會低估困難喎。

不過，劉江華喺金鐘返新工，社民連姜靈彰就聯同其餘五名黨友由大圍港鐵站遊行到隆亨邨，沿路高叫口號話：「劉華選舉得個樣！」點解社民連要遠赴大圍踩場呢？姜靈彰就話，因為佢哋要話畀當區居民知，要譴責劉江華為做官背棄選民，利用選民作為政治工具喎！劉江華辭去嘅沙田區議會田心選區議席空缺，據悉姜靈彰有意落場，其他仲有人民力量袁彌明同白鴿黨丁士元，喺三位泛民主派人士互相搶票下，相信有利公民力量潘國山重奪議席。