政壇：忽冷忽熱議員輪住病

近期天氣忽冷忽熱，加上流感高峰期殺到，立法會各黨派無分你我咁出現病菌傳播現象，唔少議員接力中招。禮拜一發展事務委員會離奇流會，事後發現原來有唔少議員因病去咗睇醫生，新民黨主席葉劉淑儀就自爆患上支氣管炎，建仔陳克勤亦因耳水不平衡求醫，醫生仲發現佢患上流感；鄉議局主席劉皇發更加要入院治療。

到咗禮拜三大會，街工梁耀忠本來要提口頭質詢，但佢以沙啞嘅聲線讀「主席，近日不少……」六個字後，已要搵工黨張國柱代佢讀埋落去。跟住就係公文袋袋巾傑，前日去長洲一間學校演講時，唔知係咪喺碼頭行番立法會時畀風吹親，夜晚亦喉痛失聲，搞到要盡量減少講嘢，免令病情惡化。班議員長時間困喺立法會，有病最好有啲公德戴番個口罩，否則傳播病菌，分分鐘搞到一鑊熟。