政壇：顏寶鈴當選人大未敢慶功

新一屆三十六名港區全國人大代表日前誕生，首次參選嘅飛達帽業控股副主席兼董事總經理顏寶鈴（顏太），以近一千一百票當選，顏太嘅助選團喺選舉過後即高舉「衷心多謝大家支持」嘅標語牌，謝票效率之高認真冇得頂，唔通顏太一早知道自己實會當選？

原來一切都係顏太助選團嘅主意，據聞都有人擔心此舉會唔會太過高調，甚至乎畀人感覺「坐定粒六」當選。不過，有份度呢條橋嘅人就認為，無論贏輸都要多謝選委支持，呢個方法簡單直接又有誠意，顏太事後都大讚助選團。千辛萬苦選港區人大，事後有慶祝活動都係人之常情，但顏太話自己未敢慶功，形容依家先係萬里長城嘅第一步，既要將勤補拙「補課」，充實自己各方面知識，亦要多啲同其他港區人大請教，唔知邊個會係顏太首個請教嘅對象呢？