政壇：大輝辣慶廠商會

有唐唐家臣之稱嘅廠商會立法會代表林大輝，近排似乎一再因為頭戴兩頂帽而出事，繼早前喺立法會答問大會上質特首梁振英（CY）僭建一事係「因果循環 報應不爽」，搞到畀廠商會發聲明「掌摑」後，上禮拜佢仲違背廠商會立場，喺立法會對CY嘅不信任動議投下贊成票，雖然影響唔到大局，但聽聞呢次贊成票，激到好多會董紮紮跳。

會董怕被標籤「深唐」

自從傳出下屆立法會有意轉戰直選嘅消息後，大輝嘅言論作風就愈嚟愈激，廠商會前晚例會就特別加插議題，畀班會董抒發不滿，聽聞十個會董九個發言鬧大輝唔跟大隊，仲有人叫佢當面道歉，不過大輝似乎冇咩意思，只係話私底下同咗會長施榮懷講聲對唔住。後尾會議一致通過咗個動議，要求大輝以後投票要跟隨廠商會立場，唔可以再咁「自由意志」。

其實廠商會班會董都係生意人居多，無謂同新政府過唔去，佢哋最怕廠商會被標籤係「深唐」陣營，所以對大輝咁大意見。據聞大輝對不信任動議投下贊成票後，班會董已密謀發起聯署信表達不滿，據聞二十五位聯署會董中，更有三位係副會長級數，包括李秀恒、徐炳光同吳清煥，佢哋個個不滿大輝冇跟廠商會立場，自把自為投票。

廠商會現時設有政治事務委員會，但個會同大輝冇乜溝通，大家各有各做，所以前晚會議除咗通過要求大輝投票立場要跟足廠商會外，仲通過成立一個新小組，呢個小組專責同大輝溝通立法會事務。我哋問大輝點拆解會董嘅不滿，佢就話有多元化聲音係好事，但唔覺得有太大問題，因為廠商會咁多會董，點都有會董唔滿意佢，亦有會董鍾意佢，總之自己會聆聽各人意見，做應該做嘅事。