SUN世代：才俊捨高薪教禮儀尋開心

他的名片上，有個穿着禮服的紳士圖案，「豊」字在旁，湊起來是「禮」。不時在公仔箱出現的電視節目主持人蘇頌輝（Desmond），四年前當上禮儀先生，開班教禮儀。他曾經有份高薪厚職，卻因一心創業而毅然放棄，更半隻腳踩進娛樂圈，身兼多職。他說，找到自己喜歡做的事，人才會活得快樂。今天，他找到了。

「點解你唔做律師？」這是蘇頌輝最常被問到的問題。讀法律出身的他，曾在美國華爾街律師樓實習，但大學畢業、考獲律師牌後，律師生涯隨即畫上句號。「最初揀讀法律，一半為父母，一半係為自己，讀讀吓先知自己根本唔想做律師，所以讀多個BBA做後備，一讀完考埋牌就無再掂呢行。」

之後Desmond走到美國一間電視台，擔任幕後製作人，負責審批節目及廣告內容，「一直都對演藝好有興趣，嗰幾年我學識好多嘢，了解到一個節目點運作。」做了三年，因感工作未能再進一步而辭職，於○六年回流返港。「有同事喺同一個崗位做咗二十八年，我唔想咁就一世﹗加上嗰時屋企人喺香港，咪打算返香港試吓發展。」

於是他掛着外國名牌大學生身份返港，加入一間美資銀行做Banker，每天見的都是富商巨賈，「個個至少都有十球美金」。那時他返朝九晚五，月薪數萬，不但要服侍「大客」，還要做「面試官」請人，客戶、同事、應徵者的失儀事卻叫他大開眼界：同事邊摸下巴邊說話、客人聊天時跟人沒有眼神接觸，進餐時又不懂餐桌禮儀……「嗰幾年見埋好多奇怪例子，我諗可能香港人無學過，就忽發奇想開公司教禮儀。」

Desmond六歲跟家人移居加拿大，是典型「竹升仔」。母親自小訓練，令他對「禮儀」特別留意，「細個食飯時，我一放隻手月爭喺枱，就一定會被媽咪話無禮貌。佢仲教我同人講嘢時，對眼一定要望住對方。」

○八年他辭去銀行工作，開設公司推廣禮儀文化，由餐桌禮儀、談吐技巧，講到見工面試。學生由小朋友、大學生，到大企業管理層也有。「其實禮儀對社交好緊要，可以改變對人嘅印象。」最難忘一次是收到一封來自十一歲小女孩的感謝電郵，「上完堂後佢特登寫咗封電郵多謝我，話會教番爹哋轉頭。其實最開心係幫到人，如果可以幫人搵到工或者搵女朋友就仲開心﹗」

外形俊朗、口才了得的Desmond，除了是禮儀公司老闆，還兼職做司儀，更是電視節目的主持人。「依家真係好忙，亦無以前咁穩定，但成個人開心咗好多，每日起身個人都充滿passion。原來只要搵到自己鍾意做嘅嘢，無論幾辛苦，都會做得好開心。」

訪問近尾聲，他見記者杯水涼了，就問需不需要加暖水，是位名副其實的「禮儀先生」。

蘇頌輝小檔案

現職：「叉」不多差很多創辦人及首席顧問

學歷：美國普林斯頓大學東亞研究學士、波士頓學院工商管理碩士及法學博士

興趣：拍微電影、健身、滑雪