政壇：政商定格：商若賢創求婚法寶「蛋中鑽」

資深珠寶設計師Pinky商若賢以一隻「蛋」為題，巧手設計出求婚法寶，一打開蛋形吊墜外殼，竟然內藏一顆晶瑩美鑽，收禮者肯定驚喜萬分。佢話呢隻「蛋」除可用作求婚之外，仲可以送畀初生嬰兒，寓意生生不息。

「蛋中鑽」嘅設計特色，係可以原隻蛋嘅物料溶咗佢，再鑄造成結婚戒指。佢更與國際知名首飾品牌嘅供應商合作，引入全天然珍貴寶石，仲話寶石對產品嘅整體質素影響好大，所以唔靚嘅寶石一定唔會要。

其實Pinky已故嘅父親都係做珠寶生意，但當時年少嘅佢性格反叛，唔肯繼承父業，畢業後寧願幫人打工。兜兜轉轉，先發覺最感興趣嘅都係珠寶設計，最終自立品牌，延續爸爸對珠寶嘅一份濃情。